..التشيع اخطر ولا التصوف اخطر ولا الجنان هو اللى جاى بيتمخطر. فين ثقافه التقبل مش فادرين تقبل بعض كمسلمين يبقى ازاى هنتقبل الاديان التانيه. الحقيقه ان الشيعه مش كفره و المتصوفين مش مشركين البلد بس هى اللى مالها شويه مجانين. ازاى ناس يبقى المفروض انهم متدينين يكفروا ناس مسلمين زيهم لمجرد انهم مختلفين معاهم فى المذهب. اللى بيحصل دا وصل للجنان الرسمى لما الواحد يسمع ان اللى مسميين نفسهم متدينين عايزين يمنعوا زياره الشيعه والايرانين لمصر. طب ماشى امنعوها بس امنعوا سياحه الاسرائليين كمان واحنا هنسقفلكوا. ولا حكايه خطر التشيع دى بتطلع علشان نلغوش على الحب المتبادل بينا وبين اسرائيل على الاقل الايرانيين مش بيقتلوا فى اخواتنا فى فلسطين. و كمان حكايه تكسير المقامات واضرحه الاولياء هو انتوا بنكوا وبين الاضرحه ثأر ولا ايه. مش بعيد بعد شويه نسمع انهم هيحرموا الموالد كمان. طب دا مولد السيده مريم من اجمل الموالد بيبقى نصوا مسلمين ونصوا مسحيين. دى عادات المصريين من الاف السنين مش هيجى حد يغيرها فى عشرين ولا تلاتين سنه. هما السلفيين ابتدوا ينتشروا فى مصر من امتى مش من السبعينات تقريبا عايزين يغيروا هويه مصر فى تلاتين اربعين سنه. مشكله السلفيين مش سياسيه مشكله السلفيين انهم عايزيين يغيروا هويه بلد احتفظت بهويتها من الاف السنين. يعنى مثلا قرأت انهم بيقولوا ان تهنئه المسلمين للمسحيين فى عيدهم حرام وانى اللى هنأ صديقه المسيحى عليه التوبه لو هما فعلا قالوا كده يبقى لازم عايزين مصر كلها تتوب. اصل مفيش حد مقالش لجاروا كل سنه وانت طيب علشان العيد. دا أنا حتى انبسطت اوى لما لاقيت جارنا انكل حاتم حط الزعف على باب العماره. اصل طول عمر الاعياد كل المصريين بيحتفلوا بيها سواء اعياد المسلمين او المسحيين. و فى دخله شم النسيم طبعا هنسمع انوا بدعه امال ايه وطبعا هنفض للكلام دا وهناكل رنجه واللى بيحب الفسيخ ياكل بس يخى بالوا من نفسوا ومتنسوش تلونوا البيض ^_^