بنت فى مجتمع شرقى

علشان انتى بنت فى مجتمع شرقى مينفعش تتكلمى بصوت عالى. علشان انتى بنت فى مجتمع شرقى مينفعش ترجعى متأخر حتى لو كان شغلك كدة. علشان انتى بنت فى مجتمع شرقى اى حد مهما كانت صلة قرابتة بيكى حقة يدخل فى ادق تفاصيل حياتك الشخصية. علشان انتى بنت فى مجتمع شرقى لازم رأى اخوكى اللى يمشى على رأيك حتى لو كنتى اكثر دينا و عقلا من اخوكى. علشان انتى بنت فى مجتمع شرقى لازم تتجوزى قبل ما تكملى 30 سنة والا هيتقال عليكى عانس فشلة حتى لو كنتى ناجحة فمجالك اصل انتى بنت فى مجتمع شرقى يعنى الست مفيهاش غير بيتها و جوزها. علشان انتى بنت فى مجتمع شرقى مهما كانت نسبة نجاحك محدش هيقدرها لو انتى مش متجوزة. علشان انتى بنت فى مجتمع شرقى لازم حياتك تتربط بحياة حد بيتحكم فيكى مينفعش ابدا تبقى صاحبة قرار نفسك والا تبقى ملكيش كاسر ومحدش هيقربلك. علشان انتى بنت فى مجتمع شرقى لازم تضيعى نص مرتبك تكسيات علشان لو ركبتى وسيلة مواصلات عامة الف كلب هينهش فيكى. علشان انتى بنت فى مجتمع شرقى لو ميشتى بمطوة هيقولوا عليكى مفكيش انوثة ولو حسيتى بأنوثتك اللى ربنا مديهالك يقولوا عليكى محسوكة و مايصة. علشان انتى بنت فى مجتمع شرقى مش من حقك تغلطى ولو غلطى ملكيش توبة مع ان ربنا نفسة بيقبل التوبة. علشان انتى بنت فى مجتمع شرقى لازم تمشى فى الشارع خايفة من كل اللى حواليكى. علشان انتى بنت فى مجتمع شرقى مينفعش تنزلى تعبرى عن رأيك فى الشارع دا انتى بنت واى حد ممكن يهتك عرضك و يركب اهلك العار. علشان انتى بنت فى مجتمع شرقى مش عارفة تحققى كيانك فى مهنتك اصل مدير الشغل كلب من ضمن الكلاب اللى عايزة تنهش فيكى. علشان انتى بنت فى مجتمع شرقى مينفعش تحبى ايش ضمنك ان اللى بتحبية دا ميطلعش كلب من الكلاب السعرانة. علشان انتى بنت فى مجتمع شرقى لو جوزك مات وانتى اتجوزتى تبقى انسانة شهوانية ومش همك جوزك اللى مات مع ان ربنا محرمش انك تتجوزى بالعكس. علشان انتى بنت فى مجتمع شرقى بيتحكم عليكى انك شمال لمجرد انك واقفة مع واحد بلليل و هو ممكن يكون اخوكى او ابن خالتك و الناس يعينى متعرفش ما انتى الغلطانة واقفة لية منغير متكتبى ناشرة مين اللى انتى واقفة معاة. علشان انتى بنت فى مجتمع شرقى لازم تحبى قاعدة البيت اصلها مقررة عليكى. علشان انتى بنت فى مجتمع شرقى بيقولوا عليكى ناقصة عقل و دين. علشان انتى بنت فى مجتمع شرقى مينفعش يبقى ليكى رأى غير اهلك والا تبقى متمردة و غريبة الاطوار. علشان انتى بنت فى مجتمع شرقى مينفعش ترفضى العريس اللى عندة شقة و عربية وتتجوزى واحد بتحبية لسة بيكون نفسة و الا تبقى غاوية فقر و بتكسرى كلام اهلك. علشان انتى بنت فى مجتمع شرقى كل اللى ممنوع عليكى مسموح لاخوكى لانة ولد فى مجتمع شرقى. مجتمع بيعتبر البنت كائن اقل من الولد فى الحقوق و اكتر بالضعف فى الواجبات. علشان انتى بنت فى مجتمع شرقى مهمتك الاساسية هى تسكين الكائنات الذكورية وتربية العيال و لازم كمان تجيبى فلوس تساعدى بيها فى مصاريف البيت و الا تبقى مش متعاونة و تنامى بلليل زى القتيلة من التعب. علشان انتى بنت فى مجتمع شرقى بيعملوكى فى البيت كأنك بضاعى منتظرين اللى يجى يشتريها. علشان انتى بنت فى مجتمع شرقى لازم تنفذى رغبات كل الناس الا نفسك. علشان انتى بنت فى مجتمع شرقى مينفعش تعيشى باختصار شديد وجودك غير مرغوب فية.