شقلب

هنستعرض وضع الاعلام مع الثورة فى الفترة اللى فاتت فى كام سطر صغيرين. النكسجية الينايرجية العملاء عندهم مخطط لتخريب مصر معايا تسجيلاتهم. ثم يحدث اقتحام لجميع الاعراف و التقاليد يأتى المذيع اللطيف الامنجى بتسجيلات لا تدل على اى شئ سوا انها تأتى بالمتفرجين إلى برنامجة و الباحثين عن الفضايح.
  قلبت القناة دى وجبت قناة تانية اما نشوف. نكسة 25 يناير اللى فرقت الشعب 30 يونيو ثورة مش موجة 25 يناير دى مكنتش ثورة اصلا.
مسكت الريموت غيرت الهم دا و جبت قناة تانية. اوعا حد يضحك عليكوا و يقولكوا ان 25 يناير كانت ثورة.
     قلبت تانى جبت قناة تانية الريموت هيبوظ منى يخرب بيوتكوا.
  انى فلة طب انى فلة قناة فلول محيرة العقول.
         قلبت تالت البطارية هتخلص جتكم الهم. احمد سبايدر يتهم ابلة فاهيتا بالتأمر على مصر. قفلت التلفزيون خالص و الحال فضل زى ما هو عدا كام يوم و ادى الاستفتاء جة روحت لاقيت اللجنة كلها شباب ثورة 19 فوق ال60 و ال70 سنة.
     احجام الشباب عن المشاركة فى الواقع السياسى احجام كامل ما اشبة اليوم بالبارحة. شعور الشباب ان الاوضاع عادت كسابق عهدها.
       بدأت اجهزة الاعلام تخفف قليلاً من السعار على الثورة و الثوار و بداية سحب الشباب باللين ولكن كلوا لسة فى الدرا و الخباء.
          مقالة فى المصرى اليوم تنشر ان الفريق السيسى يقول ان لا عودة للوجوة القديمة وان الشباب لا يجب ان لا يقلق من عودة نظام مبارك وان 30 يونيو ليست ثورة على 25 يناير.
  (شقلب.)
     25 يناير ثورة شعب استغلها الاخوان.
غيرت القناة.
         لا هجوم على ثورة 25 يناير يجب ان لايقلق الشباب.
   قلت جايز التلفزيون ضميرة صحى غيرت تالت.
 مخاوف الشباب من عودة حكم العسكر مستبعدة يجب ان لا يقلقكوا. قفلت التلفزيون و أنا متأكدة ان الشقلبة دى فى الرأى العام و فى الاعلام بتأكد اننا اقويا اوى اوى. واننا كتير مش اقلية زى ما البعض بتسول لة نفسة. و مع شقلبة الاوضاع يبقى لنا ان نتفائل بهذة الشقلبة بس اوعى تشقلب تانى.